LES MANUSCRITS DE LA BIBLIOTHEQUE INGUIMBERTINE (CARPENTRAS)
Nostradamus, ms. 1881, fol. 657-659
Soulz Aquis Sextis 3 milles tirant le couchant a treuvé une place que pour la fidélité qu’elle aporte ce nomme Constantine où estant regardant la mer y ha ung demi rond relevé dans lequel y ha la fente de rocher qui du temps de Marc Anthoines proconsul Arominie soulz l’empire Cézar feust remply exactement à cause de l’abisme et seront assurés les rectruyseurs trouver les oz de Cappito Triumvirat, ceux du passé y ont cherché trésors et treuvé mabre et plomb métafique soulz l’argile blanche qui soutient le rocher et à dextre y a l’abisme [latitinens ?] et ce prendront garde à 33 toises gizant a costé le trésor de la dame en signe blanc.
Ce messer Fricasse dict avoir faict mesurer avec la cane et treuvé ce qui a resté. La profondeur va jusques à 27 canes où l’on a trouvé l’argille et la forme de la porte cy-dessus et autres caractères mais qu’il faut aller encor jusques à 33 toises en tout qui est cinq toises de plus. Dict que l’autre creux qu’ils avaient essayé est une cisterne qu’ils ont treuvée toute faicte à costé du creux de quatre canes de profond tout seulement.
Interrogé sur le faict des tavans dict être véritable que les dictz tavans de la longueur d’un doigt vont jusques au fond estaindre les lumières et emporter le bled des lampes. Qu’il les a comminés de l’autorité de la justice de répondre sur le faict du trésor qu’ils ont rendu du bruit par trois diverses fois mais n’estre certain pour y pouvoir comprendre chose qui feust clère. Bref on ne peut asseoir à tous ses discours nul jugement certain.
Dict avoir trouvé au fond une médaille d’empereur partie cuivre partie argeant mais il ne l’a pas encore remise. Il dict que si les tavans qui esteignent la lumière estaient tués tous ceux qui seroient dans l’abisme seroient étranglés et que ne faut [suivre ?] envoyer souvant d’autre lumière. Il croit que s’il avait des gens de églize de bone vie qui les exorcisassent on treuverait l’endroit du trésor.
Cl.-N. Fabbri de Peiresc, Relation de la recherche du thrésor de Lançon de Provence faicte le moy de mars 1621 sur une lettre escritte à Aix le 2 avril ensuyvant, ms. 1821, fol. 360-361
C’est de fort longue main qu’il y a une tradition de certain grand trésor qui est en Provence, entre les villes d’Aix et de Marseille, ou les environs, fondée sur ce qu’en divers temps il s’est présenté tantôt des Juifs, tantôt des Maures, tantôt des Turcs et des Chrétiens mêmes, qu’on a tenus pour magiciens ou pour avoir eu des instructions des magiciens concernant le dit trésor, pour en faire la recherche ; et, depuis quinze à vingt années, il en est venu d’outre-mer deux ou trois, dont l’un fit creuser au lieu de Septèmes qui est à mi-chemin d’entre Aix et Marseille, un autre en autre endroit, où c’est qu’on a employé des forçats de galère et Monsieur de Guise se laissa porter à la persuasion de l’un d’eux d’y faire travailler et s’engagea en dépense de plus de six ou sept mille écus, sans qu’il se trouvât rien que fumée.
En dernier lieu, à ce qu’on écrit du 2 de ce mois d’avril, il s’est présenté un homme qui dit avoir appris d’autre qui en savait bien des nouvelles, qu’on tient aussi pour un magicien, qu’il y a un trésor dans le terroir de Lançon. C’est un village situé entre Aix, Marseille et Arles, posé contre une colline, à côté du grand chemin aurelien, que les Romains avaient fait, et conduit de Rome jusques en Espagne, a côté duquel il se voit en divers endroits des masures de plusieurs sépultures, mausolées et autres bâtiments antiques, selon l’usage des anciens de vouloir être ensevelis en vue des grands chemins.
Il dit que ce trésor consiste en trois figures d’or massif, grandes au naturel, représentant l’Empereur Constantin, avec sainte Hélène et sa fille (se dit-il) et en plusieurs coffres pleins d’or, le tout enfermé dans une cave voûtée dans les ruines et masures de certains anciens bâtiments qui se voient contre une colline auprès du dit village de Lançon.
Il y a donc fait creuser ce mois de mars par permission de la Cour, et avec l’assistance des officiers de madame de Mercure, à laquelle appartient le dit village, et y a employé des paysans, non seulement du dit village et autres voisins, mais d’autres villages distants de celui-là de neuf ou dix lieues du pays.
Il a creusé de la profondeur de quinze cannes (qui sont quasi autant de toises) et a trouvé en creusant toutes les diversités de terre, gravier, sable et autres marnes aux mêmes mesures et distances qu’il les avait prédites conformément à son mémoire, même une grande plaque ou table de marbre tout au fond, laquelle lui devait servir d’adresse et le conduire à une porte de fer ; et ayant trouvé et ouvert la porte en fer, laquelle couvrait un soupirail de cave ou une trappe, propre à jeter des raisins foulés dans une cuve lors des vendanges selon l’usage du pays, il s’y est découvert une cave voûtée assez spacieuse.
Quand on a voulu présenter des flambeaux allumés et toute autre flamme de feu, tout y était éteint dès l’entrée. Et d’autant que l’ouvrage du remuement de la terre fut achevé la veille de Notre-Dame de mars dernier, le dit jour Notre-Dame quelqu’un s’avisa d’aller quérir le cierge bénit de l’église, lequel on suspendit en l’air par le trou dans la dite cave sans qu’il s’éteignît durant quatre heures qu’il y demeura pendu, toujours allumé, durant lequel temps chacun s’essayait curieusement de discerner par le trou ce qu’il y avait dans la dite cave, autant que pouvait permettre le petitesse de lumière dans l’obscurité de cette grande cave, et l’éloignement des objets. Tant y a que, soit que les spectateurs fussent prévenus d’opinion sur le discours et mémoire du conducteur de l’œuvre, soit qu’il y eût de l’illusion des démons ou qu’ils aient pris une chose pour une autre, ce qui n’est pas impossible, les uns disaient y voir les coffres qui devaient être pleins d’or, les autres les trois figures d’or, et les autres le sol même de la cave parsemé d’or et argent monnayés ; et sur cette impression, trois paysans plus courageux que les autres s’offrirent de s’y faire dévaler pour aller voir que c’était, après avoir reconnu qu’il n’y avait point d’eau au fond ni autre chose dont ils dussent avoir peur, dont le conducteur de l’œuvre ou magicien les voulut détourner, possible pour attendre que ses conjurations fussent achevées ou que le temps qui leur est quelquefois prescrit et limité fut venu, mais contre son avis, par surabondance de courage, ils aimèrent mieux y descendre.
Aussitôt que le premier fut au fond, il fit un cri sans rien articuler qui pu faire connaître ce qu’il voulait dire, auquel cri son frère voulut qu’on le descendit vitement pour aller à son secours et il ne fut pas plus tôt au fond comme l’autre, qu’il fit un pareil cri, auquel le troisième, qui était ami particulier de tous les deux frères, voulut y descendre aussi, mais dès le milieu du chemin, ayant fait un semblable cri, on le retira en diligence, et trouva-t-on qu’il avait le cerveau fort troublé. On retira donc les deux autres qui se trouvèrent tous deux morts embrassés, l’un étranglé qui avait la gorge toute noire, et l’autre pressé par les flancs, en sorte que l’un ni l’autre ne pouvaient pas avoir rendu grande résistance. Ils étaient tous deux natifs d’un village distant de là de neuf lieues, appartenant à celui qui a écrit le premier avis de toute cette aventure. Après cela, il ne s’est pas trouvé d’autre qui eût courage de s’y hasarder, mais Mgr. l’Archevêque d’Aix, qui est le diocésain, se résolvait d’y aller avec la croix et l’eau bénite pour conjurer et exorciser ces démons.
Celui qui écrit ne dit pas d’avoir été sur les lieux, de façon qu’on lui pourrait bien avoir imposé et donné une baille, et lui l’avoir écrite innocemment sur la foi d’autrui, car il est assez véridique de son naturel et ne mentirait pas à escient ; et quand bien le fait de la recherche serait vrai, celui de l’apparence de ces figures, coffres et argent parsemé, pourrait bien être illusoire ou abusif ; d’autant que si c’est véritablement une cave à mettre du vin, comme il se peut, ce qui a semblé des coffres n’est peut-être autre chose que des tonneaux de vin, car en un autre village de Provence nommé Gaillet, situé entre Brignoles et Tourves, ruiné depuis 200 ans, lors des guerres de Raymond de Turenne, il s’enfonça depuis peu d’années une voûte de cave souterraine dans laquelle on trouva quelques tonneaux de vin dont le fût était réduit en poudre et dont le tartre servait de tonneau, et contenaient du vin épais comme de la moutarde et fort piquant et ardent à la langue ; c’en pourrait bien être de même ici, et en ce cas, les trois figures pourraient n’être qu’autant de congélations, comme celles qui se trouvent dans les antres et cavernes de montagnes, et par même moyen, l’apparence de la monnaie parsemée au fond pourrait n’être que des petits cailloux ou des petits creux faits en terre par les distillations de la pluie, qui sont ordinaires en toutes caves souterraines. En somme, il faut attendre un autre avis plus particulier pour juger de la vérité ou vérisimilitude de toute cette narration et pour être plus assuré qu’il n’y ait aucune supposition.
Anonyme, Trésor de Constantine, ms. 1881, fol. 594-602
Monsieur, ayant veu par les vostres les diversites des rellations contraires les unes aux autres de la recherche du trésor de Constantine, terroir de Lançon, terre appartenant a madame la duchesse de Mercure, pourtant tiltre de baronie, j’ay vouleu, pour vous en donner ung autre esclarsissement, faire desante sur le lieu le douziesme de ce mois de juillet, ayant avecq moy Me. Jean Lombard, conterolleur des bastimantz du Roy en ceste province, et ung maitre maçon appelé Joseph Roland, qui y a travaillé des le commancement de l’œuvre l’espace de dix mois, et celluy quy a faict et crusé le plus, et quy peult donner la vraye rellation du commancement et du progres de l’œuvre et l’estact auquel elle est a presant.
Sur ung testre fort hault eslevé et n’estant commandé d’aulcune part, pourtant sa veue du couste du couchant et midy dans l’estan du Martegue, Chasteau-Neuf, Marignane, et de l’oriant toute la plaine de Velaulx et Ventabren, de difficille ases, fors du coste de Lançon quy est de septantrion, a ceste advenue la plus facille et aysée ; la, une meuraille attachée a la pointe d’ung roc du couste d’oriant tirant au couchant, ayant de cinq ou six pas de distance sept tours separées l’une de l’autre de ceste distance, de fort mauvaise matiere, toutes massives, en forme piramidalle et rondes et que sort de la meuraille, estant de mauvaise pierre, que nous disons lauzes, mises les unes sur les autres et amplatrées et basties de terre, quelques-unes desdictes tours ayant a son pied quelque pierre carrée, cella marquant l’ensaingte d’une ville que contenoict tout ce tertre-la de la grandeur du circuit de la ville de Pertuis, ceste ensaingte apparoissant encore en des restes de ruines de meurailles attachées encore en des coings de rochiers. De ce couste de septantrion que feust l’advenue par ou je vins, ayant couché à Lançon, et entré dans ce tertre par la breche de la meuraille entre deux tours tout à cheval, de trante pas de la plus ou moingz, j’ay treuvé une assiette fort platte et telle qu’il sambloit que le pandant de tout ce teltre venoit de couller ses eaux dans ceste assiette. Il y a une meuraille en forme d’ung demy sercle entre l’oriant et le midy, estant du costé de l’ocsidant en ligne droicte et ouvert du couste de septantrion ou ladicte muraille a esté discontinue, ayant cinq ou six cannes de diamettre, relevés dessus terre quatre ou cinq pans ou environ de matiere en forme de tapis ou simant et telle que les antiens faisoient aux aqueducs des eaux samblable a celle que vous aves veu aux aqueducs de Frejus. Dans cest enclos se treuvent deux avencs, l’ung du couste du couchant, l’autre du coste d’oriant, et separés ung de l’autre de trois cannes ou environs ; le premier, quy est tout contre la muraille a droicte ligne, est celluy que Anthoinne de Conna, soy disant docteur millannois, par la permission de la cour, appres avoir esté ouy par Mr. le conseiller Seguiran, sur la proposition qu’il fist par requeste de luy donner commissaire pour l’ouir sur chose importante qu’il avoict à communiquer a la cour pour le bien et service du Roy et de l’Estat, et a cez fins qu’il pleut a la cour l’eslagir de la prison ou monsieur le premier presidant de Bras l’auroict faict mettre aprez luy avoir communiqué en sa maison de Saint-Pons, ayant esté ceste requeste decrettée a mon rapport sur la recharge et commis ledict sieur conseiller Seguiran, et l’ayant ouy sur ceste proposition et deliberé sur le registre que ledict de Conna pouvoict faire la recherche du tresor qu’il presuposoit treuver, a ses fraictz et despans, appellé les magistratz plus prochains, et qu’il n’auroict que ung tiers en cas de descouverte, les autres deux tiers appartiendront au Roy et au proprietaire, ensuitte de ceste deliberation et appellant a garant le Parlament pour persuader beaucoup de bons artisans de ceste ville quy se sont ruinés et deux quy sont mortz en ceste recherche vaine et mansongere, l’ayant tousjours jugée ainsins et telle, aussy n’avois-je daigné vous en escripre, ce n’est parce que vous m’y aves semons.
C’est donc en ce premier avenc contre ladicte meuraille en droicte ligne que ledict de Conna a accommancé de faire creuser, ayant treuvé a six cannes de l’antree ung roc qui avansoit, qui l’a contrainct de biesser, et c’est jusques-là que vous pouves veoir la profondeur au-dessous de ce roc, on a creusé encore jusques a vingt quatre cannes, ayant treuvé e dessandant et de distance d’environ deux cannes, plus ou moings, tous les caractaires que je vous ay envoyé cy-devant escriptz de la propre main dudict de Conna qu’il prenoit [en ma presence] dans les tabletes qu’il avoict et que le susdict Joseph (quy est celluy quy en a faict la descouverte) m’a assuré estre telz et que lorsqu’il les a descouverts gravés dans le roc (tousjours en dessandant et creusant) estoient couvertz d’arsille, disant neantmoings que c’est manterie que l’idolle et la porte à demy descouverte qu’il y a mis, pour n’avoir treuvé ni l’ung ni l’autre.
Ce Joseph m’a dict cez particulliarités suivantes, c’est que en creusant il y avoict des jours que, quelque soing qu’ilz eussent, ilz ne pouvoient garder la lumiere, voire mesme en faire, bien qu’ilz eussent des allumettes grosses comme le doict bien antournées de souffre et empoissées ; a ce jour-là le feu ne faisant que couler au long d’icelles sans se prandre, d’autres jours il y avoict quantite de tans ou tanans, les ungs noirs, les autres jaulnes, les autres violletz, et autres d’autres couleurs, quy en passant estaignoient la lumiere tout affaict, avec le feu de lumignon, ung tout seul d’iceux le faisant, bien que lumignon feust au double, comme on faict au moulin a huille ; que le jour de la Nostre-Dame cez tans en nombre de cent ou environ vendrent rouler a l’entour de l’emboucheure de ce trou presque tout le jour, dont le lendemain ayant este quelqu’un en bas pour faire de la lumiere et travailler, n’ayant peu l’allumer, s’estant faict tirer en hault, deux freres, dont l’ung estoit mareschal, vouleurent descendre et pourter du charbon, le mareschal disant qu’il ne craignoit point la feumee d’icelluy, neantmoingz ceste fumee les estouffa tous deux, ledict Joseph l’assurant ainsy, parce que ce feust luy quy recoureut le troisiesme parant des deux premiers, quy estoit a demy mort de ceste fumee, et dont ilz ne peurent de ce jour retirer les corps, [mais] a deux divers jours suivantz, l’ung apres l’autre.
Dict encore que, ayant creusé vingt deux cannes et prins justement les mesures, aprez cella creuserent durant quinze jours, a chascun jour quatre ou cinq pans, que pouvoient estre vingt cannes qu’ilz avoient creusé par dessus le reste, et neantmoingz ils treuvarent leur œuvre disminuée de deux pans, n’ayant treuvé que vingt une canne et six pans.
Sur les tans, monsieur de Callas m’a dict que en l’annee septante deux que en vostre bastide de Perrovier a Meragues vostre rantier pour lors appellé Sebastien y auroict faict venir le feu huissier Trompet et quelques autres pour faire la descouverte d’ung thumbeau ou il disoit y avoir ung trezor, que ayant fossoyé et descouvert les pierres du thumbeau ainsy qu’il en voleut enlever une, [elle] ne feust pas plus tost disjoincte et ouverte, que quantite de tans vindrent donner au visage de cez gens-là et les mirent en fuitte, que aprez se reprenant ilz resouleurent, parce qu’il estoit tard, d’y revenir le landemain, ce qu’ilz firent, treuvant ce lieu qu’ilz avoient descouvert [recomblé en sorte] qu’il y avoit cent charrettees de terre au-dessus, et se treuvant hors de cognoissance de quel cousté pouvoit estre le thumbeau, ilz quiterent leur dessaing, que de despuis ung boyer, n’y a pas longtemps, avec le soc de la charrue auroit treuvé une hurne de terre plaine de charbon, ce que disant audict de Conna, icelluy disoit que les tans estoient des demons qui gardoient ledict trezor, et que ce charbon, s’il eust esté allumé au feu, eussent esté treuvéz lingotz d’or.
L’autre avenc du couste d’oriant et proche du demy sercle, ledict de Conna le faict creuser, y ayant desja environ cinq ou six cannes, et croyt qu’il en treuvera autant en celluy-cy qu’à l’autre, et parce que tous ses gens l’ont quitté, il a donné requeste par-devant le lieutenant general de ceste ville tandante [à] adjournement contre iceux pour venir veoir dire qu’ils seront descheus de la societte, part et pourtion du tresor et luy sera permis d’en associer d’autres.
Le sieur Lombard faict son jugement que, lorsque ceste ville estoit en estat, ilz avoient faict creuser en ce lieu ung puis pour y treuver de l’eau comme on a faict a Sisteron, a Grignan et en la citadelle d’Orange, que, ne l’ayant treuvée, ilz auroient faict du batum au fondz et a l’antour pour y faire ung reservoir des eaux pluvialles, le lieu estant propre, comme je vous ay dict cy dessus.
A vingt pas de ce demy sercle est ung pan de muraille bien faicte et de bonne massonnerie, ayant ung retour de pied droict, qui samble estre une entree de porte de ville, estant ce pan de muraille de trois cannes de long et une et demy d’hauteur.
Voyla, Monsieur, tout ce que je vous puis dire du lieu ou l’on cherche ce tresor imaginaire, y ayant desja longtemps que, sy j’eusse esté creu, ce miserable homme eust esté chassé de ceste ville et de ceste province, messieurs ayant esté sur le point a diverses fois d’en faire deliberation, et ayant esté par le feu sieur Vicard et autres, en presance de monsieur le conseiller Thouron, examiné, feust treuvé une grosse beste, cella l’a faict negliger de le chasser, durant trois ans qu’il y a qu’il roule en ceste ville, il a faict imprimer quelque discours de la fisonomie, qu’il m’a donné autrefois, que je chercheray et vous anvoyeray, c’est ung homme aagé de quarante cinq ans et quy a vandeu quelque vaissaille d’argent pour fouiller son tresor, a l’immitation du chien d’Esoppe laissant le sertain pour prandre l’immaginaire.
Excuses moy, Monsieur, sy je sous envoy ceste relation sy mal suyvie, et non corrigée, n’ayant le loisir de la fere mettre au net, pour prandre ceste occasion de ce pourteur, n’y ayant qu’une heure qu’il a pleu a monsieur de Vallaver m’en donner advis.